Loando al señor redemidor nuestro

con grant voluntat pesada perfeta

noble cavallero trobador diestro,

siguiendo a Davit muy santo profeta

llagar vos há Venus peor que saeta,

quien es Saturno en tiempo diurno

sus passos fallecen rompiendo el coturno

quier ande a la guisa, quier a la gineta.

Polido en trobar miras lo que fundo

por astrología de vos bien amada,

que Venus beldat da lo segundo,

enciende luxuria más desordenada,

Saturno influye maldat acabada,

da nos pestilencias de su condición

pero a vuestros dichos de sana entinción

ya mi voluntat vos é obligada.

Fablar de escripturas quando contesciere

yo non contradigo con lengua sepista

nin yo manoscabo al que bien dixere

quanto quier que sea peqeño legista,

pero si me fabla de Remón Lulista,

sofrir non me cumple sus dichos ceviles

loar non se deve de lindos astiles

quien pule sus rayos como la matista.

Si fuese envidioso en justo fablar

ternía mis dichos por mucho menudos

nunca vi secretos de Dios en ditar

nin al tal saber non somos tenudos

los fechos divinos son a nos escudos

que non alcanço el flaco armador,

gentil nin judío nin arrendador

que tiene tristeza con gestos cejudos.

Él faze los ossos con cueros lanudos

al que poco sabe ser grant sabidor,

pocos son los sabios de sabio valor

que tengan los pechos e lomos peludos.