Segund que fingides so vuestro encomienda

están las ciencias de todos metales,

mas testos e glosas de mis decretales ,

segunt me paresce leistes corrienda,

por ende, maestro, sabet que respenda

de vuestra ordenança el muy grant remón,

Ricardo e Pánfilo, Escoto e Agrimón,

los cuales mandaron que vos reprenda .

Ca puesto por caso que puge e trascenda

la vuestra ciencia de finos cristales ,

e callen los simples remotos brucales,

que non fueron dinos aver tal prevenda,

a vuestra persona sotil reverenda,

fermoso le fuera loar con razón,

los altos poetas que luenga sazón

trovaron por artes de alta calenda.

E porque non siento quien non condescenda

a vuestras dotrinas por ser tan morales

las flores de adelfa con lindos rosales,

que non se conforman en dar su ofrenda,

por ende siguiendo, señor, vuestra senda ,

e non lo tomando de vos el baldón,

yo cerca de aquesto so vuestro pendón ,

seré todo siempre, tomad esta prenda.

Pero si vos plaze que desto dependa

que tangan las trompas e los atabales

e yo suba quintas en bozes tumbales

“de vuestra madexa quebrada es la cuenda”,

ca yo non me rindo como omne que arrienda,

pero si vos punçó en el coraçón

faré que vos tome tan grant toroçón

que desta linda arte vos prive e suspenda .

Pasteles de pollos con polvos de hiienda,

e festes de noya con buen salpicón

vos tengo guissados en un replicón

sobre que vevades, señor, en merienda.